У экспазіцыі прадстаўлены пластычны эквівалент музычных пераваг і філасофскіх разважанняў жывапісца, сябры Магілёўскай абласной арганізацыі Беларускага саюза мастакоў Ігара Бяспалава.
Пераважна буйны фармат работ, абумоўлены тэмпераментам аўтара, які стварае мастацкую прастору, якая актыўна апелюе да гледача, залучае яго «ў свае межы» і бударажыць пачуццёвы апарат.
Прадстаўленыя працы можна падзяліць на два тыпы: тыя, у якіх адгадваецца сюжэт, і – нефігуратыўныя кампазіцыі. Наратыўны дыяпазон экспазіцыі прадстаўлены аўтарскай рэфлексіяй на ўбачанае, пачутае і прачытанае: чалавек і горад, гістарычныя і міфалагічныя сюжэты, матывы прыроды – паказаны ў праламленні вядомай экспрэсіўна-дэкаратыўнай аўтарскай манеры.
Рытмічнасць ліній і плям, якія раздражняюць оптыку рэцыпіента каларыстычныя спалучэнні, фактурны ландшафт жывапісу – усё гэта накіравана на запрашэнне гледача да актыўнага дыялогу.
Экспазіцыя з’яўляецца своеасаблівай рэтраспектыўнай творчай справаздачай мастака за апошнія 10 гадоў, такім чынам у наведвальнікаў сталічнай «Галерэі Мастацтва» з’яўляецца ўнікальная магчымасць зазірнуць у атмасферу майстэрні магілёўскага жывапісца-авангардыста Ігара Бяспалава.
