З 15 лютага 2023 года ў Арт-гасцёўні “Высокае мѣста” пачне працаваць персанальная выстава графікі “Паміж Сцылай і Харыбдай” вядомага беларускага мастака Юрыя Якавенкі. Выстава падрыхтавана сумесна з Беларускім саюзам мастакоў
Вытанчаная прыгажосць выканання, насычанасць тонкімі алегарычнымі падтэкстамі робяць афорты Юрыя Якавенкі зразумелымі і блізкімі для ўсіх, хто пагружаны ў мінулае, як і сам аўтар. Яго працы адрознівае высокая тэхніка выканання. Канфлікт, кантраст, супрацьпастаўленне стваральнага і разбуральнага, эстэтыка лініі і плямы на паперы – вось што ў першую чаргу цікавіць аўтара. Прыцягваючы шырокія фрагменты сусветнага мастацкага і культурнага досведу, аўтар выступае як мастак сучаснай генерацыі, для якога выкарыстанне, цытаванне дасягненняў сусветнага мастацтва і культуры – цалкам натуральны метад творчага самавыяўлення. Усё гэта прыводзіць да дыялогу з гледачом-інтэлектуалам, які ва ўсім імкнецца знайсці зашыфраваны падтэкст.
У экспазіцыі выставы “Паміж Сцылай і Харыбдай” прадстаўлена некалькі новых серый мастака. Адна з найбольш яскравых серый “Ясон і Арганаўты” – гэта гістарычныя і сэнсавыя асацыяцыі міфаў і паданняў старажытнай Грэцыі, якія пры гэтым не з’яўляюцца непасрэднымі ілюстрацыямі да зместу саміх твораў. Гэта своеасаблівая гульня ў аналогіі і метафары, дзе асновай мастацкага мадэлявання свету становяцца калізіі гісторыі. Нягледзячы на сучаснае пераасэнсаванне міфалагічных сюжэтаў, Юрый Якавенка не можа поўнасцю пазбавіцца ад іх магічна-цудадзейнага ўплыву. І калі ў тэксце яны выяўляюцца праз россып расповядаў пра прыгоды грэчаскіх герояў і багоў, то ў графічных лістах мастака становяцца знакавай сістэмай, распрацаванай для філасофскага асэнсавання і эстэтычнага глядацкага ўспрымання, якая набывае выключную важнасць для разумення сэнсавых акцэнтаў кожнай з прац.
У кожным творы мастак сумяшчае вытанчаную вязь дэталяў і фармальную пластыку фону. Усе кампазіцыі прасякнуты адчувальнай самаіроніяй сучаснага чалавека, які з асаблівай вастрынёй разумее, што рэальнасць застаецца такой жа недасканалай, як і шмат стагоддзяў таму. І толькі мастак можа дазволіць сабе “гуляць” з ёй: ствараць і разбураць на паперы сусветы…
