Прэмія прысуджаецца ў сямі намінацыях: жывапіс, графіка, скульптура, дызайн, манументальнае і манументальна-дэкаратыўнае мастацтва, дэкаратыўна-прыкладное мастацтва і творчы дэбют.
Акрамя таго, была ўручана ўзнагарода за ўклад у развіццё выяўленчага мастацтва, якая ўручаецца мэтрам па сукупнасці заслуг перад айчыннай культурай. Яе атрымаў вядомы бабруйскі мастак Валерый Калтыгін . Валерый Аркадзьевіч – родапачынальнік так званага “бабруйскага стылю” ў кераміцы, арганізатар і кіраўнік штогадовых міжнародных пленэраў “Арт-Жыжаль”, на якія з’язджаюцца керамісты з усёй Беларусі і з-за мяжы.
У намінацыі “Творчы дэбют”, спецыяльна прызначанай для перспектыўнай моладзі, перамагла Марта Шчарбіч – студэнтка 3-га курса Беларускай дзяржаўнай акадэміі мастацтваў.
Лаўрэатам Нацыянальнай прэміі ў намінацыі “Графіка” стаў Усевалад Швайба за цыкл работ “Хатынь”.
У намінацыі “Манументальнае і манументальна-дэкаратыўнае мастацтва” перамогу атрымала работа мінскага скульптара Аляксандра Шапо “Дрэва дарог”, якая ўпрыгожвае станцыю метро “Вакзальная”.
У дэкаратыўна-прыкладным мастацтве была адзначана Наталля Лісоўская, чыя творчасць прасякнута нацыянальнымі беларускімі матывамі.
Узнагароду ў намінацыі “Дызайн” атрымаў дызайн-праект экспазіцыі Слуцкага краязнаўчага музея, які быў распрацаваны і рэалізаваны калектывам пад кіраўніцтвам мастака Глеба Отчыка.
У намінацыі “Скульптура” быў узнагароджаны скульптар Андрэй Вараб’ёў з Магілёва – нават тыя, хто чужы высокаму мастацтву, ведаюць яго па вясёлым помніку агурку ў Шклове, скульптурным ільвам на мосце і фантану “Маленькі прынц” у родным для майстра Магілёве.
А вось прэмія ў намінацыі “Жывапіс” з’ехала ў Віцебск – яна дасталася мастаку Васілю Васільеву за цыкл прац біблейскай тэматыкі “Іерусалім. Спёка і холад вечнага горада».
