23 лютага – 24 сакавіка 2024 года ў музеі працуе часовая экспазіцыя, прысвечаная 80-годдзю вызвалення тэрыторыі Беларусі і яе сталіцы, горада Мінска, ад нямецка-фашысцкіх захопнікаў.
На выставе прадстаўлены фатаграфіі, жывапісныя і графічныя работы са збору Нацыянальнага гістарычнага музея Рэспублікі Беларусь. Сярод аўтараў работ – М. Аксельрод, М. Дучыц, А. Тычына, А. Паплаўская, М. Рыжыкаў, У. Басалыга, У. Шаркоў і інш. Праз свае творы фатографы і мастакі выступаюць у ролі гістарыёграфаў беларускай сталіцы.
Мастацкія творы здольныя перадаваць многія нюансы і дэталі, яны выдатна адлюстроўваюць трансфармацыю, якую Мінск перажываў на працягу ўсяго ХХ стагоддзя, – з імклівым развіццём у першай палове стагоддзя, ваеннымі разбурэннямі, наступным аднаўленнем і урбанізацыяй, будаўніцтвам новых мікрараёнаў і адраджэннем гістарычнага цэнтра. Прадстаўленыя творы з’яўляюцца цікавым дакументальным матэрыялам для даследчыкаў архітэктуры і гарадскога побыту.
