«Арт-Брэст – 1000»

Паважаныя мастакі!

Сёлета ў верасні Брэст адзначае свой 1000-гадовы юбілей. У 2019 годзе Брэст таксама аб’яўлены культурнай сталіцай краін СНД. Урачыстыя святочныя мерапрыемствы распачнуцца 6 верасня і працягнуцца ўвесь месяц.

Мы запрашаем усіх зацікаўленых мастакоў да ўдзелу ў Рэспубліканскай мастацкай выставе “АРТ-БРЭСТ – 1000”, якая адбудзецца ў выставачнай зале па вуліцы Савецкай, 54. Спадзяемся на актыўны ўдзел у гэтай імпрэзе ўраджэнцаў горада і Берасцейшчыны, ды ўсіх, хто не абыякавы да тэмы старажытных гарадоў Беларусі.

У прапанаваных творах мы чакаем адлюстраванне вашага разумення гэтай гістарычнай падзеі для Беларусі. Брэст – своеасаблівы памежны горад з багатай і ў той жа час трагічнай гісторыяй, у якім перакрыжаваліся мноства культур розных народаў.

Для кагосьці з Брэстам звязаныя ўспаміны з далёкага маленства, для іншых – вучоба альбо служба ў войску. Усё гэта можа быць матэрыялам для мастацкага адлюстравання.

Шчыра запрашаем вас да ўдзелу ў Рэспубліканскай выставе, прысвечанай 1000-годдзю старажытнага горада Брэста!

Аргкамітэт

 

 

Паважаныя мастакі-акварэлісты!

Інфармуем Вас аб стварэнні першай у Беларусі “Акварэльнай галерэі” у г./п. Расоны Віцебскай вобласці (рашэнне Расонскага райвыканкама ад 15.04.2019 г.). Для яе размяшчэння вылучаны будынак пачатку ХХ ст. – былы маёнтак Гласка, якому патрэбны рамонт. Зараз Галерэя часова размешчана ў адрамантаваных памяшканнях Дзіцячай школы мастацтваў. Распачата выставачная дзейнасць, фарміруецца мастацкі фонд, складаецца наменклатурная дакументацыя. У перспектыве мяркуецца перарастанне Галерэі ў Музей акварэлі і малюнка рэспубліканскага падпарадкавання.

  • Запрашаем Вас далучыцца да агульнай справы культурнага будаўніцтва на малой радзіме.
  • - Уступным крокам да супрацоўніцтва з “Акварэльнай галерэяй” з’яўляецца дарэнне аднаго або некалькіх аўтарскіх твораў або акварэляў з прыватных, сямейных калекцый. Аркушы прадстаўляюцца без рам разам са звесткамі аб аўтары. Рашэнне аб прыёме работ прымае экспертная камісія. У выпадку закрыцця галерэі творы рашэннем камісіі размяркоў-ваюцца ў іншыя мастацкія музеі рэспублікі.

  • - Дадзеныя аб творах і біяграфічныя звесткі аб аўтарах, уносяцца ў каталог “Расонская акварэльная галерэя”, першае друкаванае выданне якога плануецца здзейсніць у 2021 годзе.

  • - Аўтары работ будуць інфармаваны аб экспанаванні сваіх твораў у пастаянных, перасоўных і іншых выставачных праектах, якія праводзіць галерэя.

  • - Мастакам-сябрам Галерэі прадстаўляецца першачарговае права браць удзел у планавых мерапрыемствах галерэі: персанальных выстаўках, пленэрах (калектыўных і персанальных), майстар-класах, канферэнцыях, фестывалях і іншых форумах акварэлістаў.

На сённяшні дзень:

 - 19 чэрвеня 2019 адкрыта выстава акварэльных твораў, перададзеных ў дар Галерэі. Сярод іх творы Г.Паплаўскага, З. Літвінавай, С. Катковай, В. Ляховіч, Ф. Гумена, Ф. Кісялёў, І. Лобан, А. Кастагрыза, В. Каўзановіч і іншых.

- У маі 2015 выдадзены насценны перакідны календар (тыраж 108 тыс. экз.), які ілюстраваны акварэлямі з фонду Расонскай акварэльнай галерэі.

- У верасні 2019 г. у Расонскім раёне плануецца правядзенне Рэспубліканскага акварэльнага пленэру, прысвечанага 225-годдзю з дня нараджэння Яна Баршчэўскага.

Кантакты:

Рынкевіч Уладзімір Іванавіч, навуковы кансультант галерэі. Тэл. +375 29 5749713

E-mail: Этот адрес электронной почты защищен от спам-ботов. У вас должен быть включен JavaScript для просмотра. www. aquavir.by

Лукашэнка Наталля Мікалаеўна, галоўны спецыяліст аддзела ідэалагічнай работы, культуры і па справах моладзі Расонскага райвыканкама. 8 02159 56789; +375 29 2112161

 

Спектакль «Прымітывы», прысвечаны мастачцы Алене Кіш (27.06.2019)

Алена Кіш – мастачка-самавучка з індывідуальным поглядам на сусвет і творчасць, жанчына без свайго дома і сям’і, творца, ад якой засталася толькі легенда. Спектакль «Прымітывы» рэжысера Аляксандра Марчанкі вяртае да сучаснасці трагічную гісторыю Алены Кіш. Беларуская мастачка з наваколля Слуцка зарабляла на жыццё, ствараючы «дываны-маляванкі» для вясковых жыхароў. У пастаноўцы асоба і лёс Алены Кіш становяцца ўвасабленнем часу, які не прымае інакавасць.

Тэатральны праект «Прымітывы» пабудаваны на матэрыялах пра жыццё Алены Кіш: дзённікавых запісах аднавяскоўца Кіш, Грыгорыя Гардзея, які апісваў будні вёскі, дзе яны жылі; газетных артыкулах таго часу. Важнай часткай тэатральнага даследавання з’яўляюцца разважанні нашых сучаснікаў – мастакоў, гісторыкоў, культуролагаў – аб значэнні асобы і творчасці мастачкі ў грамадстве, дзе паняцце «мастачка» па-ранейшаму ўспрымаецца далёкім ад сацыяльнага жыцця.

Ад стваральнікаў праекта:

 – Гісторыя праекта «вырасла» з нашых розных, але вельмі асабістых адносін не толькі і не столькі да творчасці Алены Кіш, колькі да яе трагічнага лёсу. Мы збіралі матэрыял для п’есы ў падарожжах па Беларусі, у архівах і бібліятэках. Думалі аб культурнай і эмацыйнай памяці, аб ідэнтычнасці, якая будуецца на гэтай памяці. Аб вечна асаблівай ролі мастака ў жыцці грамадства, які заўсёды ўспрымаецца грамадствам як нешта неабавязковае і залішняе; а мастачка ў «традыцыйнай» культуры – гэта яшчэ і выклік гэтаму грамадству. Думалі аб папулярызацыі мастацкай спадчыны, якая часта становіцца спрашчэннем і спекуляцыяй. Мы думалі аб тым часе, які быў бязлітасны не толькі да Алены Кіш, але і да мільёнаў нашых суайчыннікаў, яе сучаснікаў, якія прайшлі праз жахі калектывізацыі, гвалтоўнага перасялення, рэпрэсіі. Пра час, які не толькі тады, але і цяпер не трывае інакавасці і не пакідае свабоды для творчасці. Мы думалі. І працягваем думаць.

Наш праект – гэта не толькі пастаноўка спектакля, але і дыскусія вакол яго. Яна павінна вывесці ў грамадскае абмеркаванне тэмы, закранутыя ў «Прымітывах». Да гэтай дыскусіі мы запрашаем не толькі экспертаў ў галіне культуры, але і ўсіх зацікаўленых гледачоў, якія паглядзяць спектакль. 

У сувязі з тэматыкай спектакля - спецыяльная прапанова для супрацоўнікаў і членаў Беларускага саюза мастакоў!

Наша кампанія прапануе зніжкі 15% на квіткі спектакля "Прымітывы", якую магчыма атрымаць па прамакодзе BSMART тут: 
https://bezkassira.by/prymtyvy-6367/

Акрамя таго, пры калектыўнай заяўцы (ад 10 чалавек) - зніжка 25% на квіток + фатаграфіі з наведвання мерапрыемства. Таксама пры наяўнасці калектыўнай заяўкі ад 50 чалавек ёсць магчымасць правядзення мэтавага закрытага паказу любога з нашых спектакляў спецыяльна для вашых супрацоўнікаў.

Аўтар п’есы: Аляксей Андрэеў

Рэжысёр: Аляксандр Марчанка

Мастачка: Ганна Балаш

Музычнае суправаджэнне: Дзмітрый Лук’янчык

Выканаўца: Алесь Малчанаў

Працягласць: 1 гадзіна 15 хвілін (без антракту)

Мова: беларуская, руская

Партнёр праекта «Лятучы ўніверсітэт».

Месца правядзення: Культурны хаб Ок16 (Кастрычніцкая, 16/27)

16+ 

 Чытайце больш на сайце праекта.

 

Запрашэнне да ўдзелу ў выставе, прысвечанай 75-годдзю вызвалення Беларусі

Беларускі саюз мастакоў запрашае прыняць удзел у выставе, прысвечанай 75-годдзю вызвалення Беларусі.

Урачыстае адкрыццё выставы адбудзецца 4 ліпеня 2019 г.

Мастацкія творы прымаюцца ў Палацы мастацтва да 1 ліпеня 2019 г.

Запрашэнне да ўдзелу ў выставе, прысвечанай юбілею Станіслава Манюшкі

Шаноўныя калегі!

​5 траўня 2019 года спаўняецца 200 гадоў нашаму славутаму земляку, вялікаму кампазітару Станіславу Манюшку. 

​З нагоды гэтага юбілея ў пачатку чэрвеня плануецца правядзенне мастацкай выставы. Просім верагодных удзельнікаў гэтай імпрэзы праінфармаваць сакратарыят ГА “БСМ” аб вашых намерах і магчымасцях.

​Інфармацыю пра кампазітара ды мясціны, звязаныя з ягонай асобаю, шукайце ў інтэрнэце ды Музеі музычнай і тэатральнай культуры.  

Сакратарыят ГА “БСМ”

Апошнiя навiны