Сутнасць мастацтва – у яго сувязі з рэчаіснасцю, разрыў з рэчаіснасцю робіць мастацтва незразумелым (Рудольф Арнхейм).
31 сакавіка (18-30) у прасторы ZAL #2 будзе адкрыта выстава графікі і скетчу “Big city life”.
У эпоху развіцця постіндустрыяльнага грамадства паскоранае ўспрыманне часу на фоне хутказмяняльных тэхналогій вызначае адну з цэнтральных тэм у мастацтве – тэму паўсядзённасці. Навакольны свет цесна звязаны з успрыманнем горада, індустрыялізацыі, развіццём камунікацый. Чалавек у сучасным свеце сутыкаецца з вялізным патокам інфармацыі, якая ўздзейнічае на яго. Ён не ў стане кантраляваць уплыў асяроддзя і павінен прыстасавацца да яе.
Мастак заўсёды найболей востра адлюстроўвае рэальнасць і шукае спосабы зафіксаваць яе. Адным з такіх спосабаў з’яўляецца мастацтва скетчу. Гэта малюнкі, якія выяўляюць ідэі і канцэпты з дапамогай візуальных вобразаў. У скетчынгу не патрабуецца дакладнае капіраванне формы прадметаў. Важней за ўсё тое, што хуткі малюнак дазваляе зафіксаваць успрыманне мастаком прасторы гарадскога асяроддзя ў пэўным моманце. Арыгінальная графіка наадварот дазваляе стварыць больш дэталізаваныя, унікальныя малюнкі, спыняючыся на асобных фрагментах горада, яго разнастайнасці.
На выставе “Big city life” можна ўбачыць графіку і скетчы найбольш актуальных беларускіх аўтараў: Ганны Кохан, Веранікі Талецкай, Лізаветы Емяльянавай, Міхаіла Дайлідава, Марыі Сыракваш і Наталлі Язерскай. Кожны з гэтых аўтараў прадставіць сваё ўспрыманне «Вялікага горада» ва ўзаемадзеянні з чалавекам, які адчувае сябе неад’емнай часткай горада, адчуваючы ўрбаністычную адзіноту і сацыяльныя трывогі.
