12 кастрычніка 2023 года на 81 годзе пайшоў з жыцця вядомы беларускі скульптар ЭДУАРД БАРЫСАВІЧ АСТАФ’ЕЎ.
Беларускі саюз мастакоў выказвае глыбокае спачуванне родным і блізкім мастака.
Эдуард Астаф’еў родам з горада Хімкі Маскоўскай вобласці. Але скончыўшы ў 1972 г. Беларускі дзяржаўны тэатральна-мастацкі інстытут у народных мастакоў А.А. Бембеля і А.К. Глебава, прысвяціў сваю творчасць беларускай культуры.
Сярод шматлікіх работ Эдуарда Астаф’ева можна вылучыць: манументальныя комплексы, прысвечаныя Вялікай Айчыннай вайне, манумент Раману Шацілу ў Светлагорску, мноства мемарыяльных дошак (М. Багдановічу, П. Пестраку, К. Чорнаму і інш.). Таксама вядомы працы за межамі Беларусі. Найбольш яскравым можна адзначыць помнік Францыску Скарыну, устаноўлены ў Празе. За стварэнне помніка мастак атрымаў ад МЗС Чэхіі медаль.
З 1978 года Эдуард Астаф’еў член Саюза мастакоў СССР. Удзельнік міжнародных выставак у Расіі, Эстоніі, Латвіі. Многія яго работы захоўваюцца ў музеях і мастацкай калекцыі саюза.
