На 98-м годзе жыцця 14 студзеня 2021 года пасля цяжкой хваробы памёр народны мастак Беларусі, лаўрэат Дзяржаўнай прэміі Беларусі ЛЕАНІД ДЗМІТРЫЕВІЧ ШЧАМЯЛЁЎ.БЕЛАРУСКІ САЮЗ МАСТАКОЎ, СЯБРЫ І КАЛЕГІ, УСЯ ТВОРЧАЯ СУПОЛЬНАСЦЬ ШЧЫРА ПАДЗЯЛЯЕ ГОРА, ЯКОЕ НАПАТКАЛА СЯМ’Ю МАСТАКА, І ПРЫНОСІЦЬ САМЫЯ ГЛЫБОКІЯ СПАЧУВАННІ ЯГО РОДНЫМ, СЯБРАМ І БЛІЗКІМ.
Пра час і месца развітання з Леанідам Дзмітрыевічам Шчамялёвым мы паведамім пазней.
Пайшоў з жыцця знакаміты беларускі творца. Легенда айчыннага мастацтва. А разам з ім – цэлая эпоха… Горка і балюча…
Леанід Шчамялёў… Чалавек дзіўнага творчага лёсу, які ўнёс вялікі ўклад у скарбніцу нацыянальнай выяўленчай культуры. “Мае палотны – мае дзённікі” – зазначаў Леанід Шчамялёў. Партрэты балерыны Людмілы Бржазоўскай, мастака Віталя Цвіркі, пісьменніка Якуба Коласа… Гарадскія пейзажы Мінска, Віцебска… Малюнкі з падарожжаў па Сярэдняй Азіі, Поўначы… Сюжэты са вяселлямі, святы… А якая казачная вада ў яго жывапісных рэках і азёрах!.. На адным з самых вядомых палотнаў «Нібы ў сне» ён разам з жонкай Святланай узлятае на чароўным скакуне і лунае над роднай Беларуссю…
Леанід Дзмітрыевіч Шчамялёў стаіць у шэрагу тых мастакоў, творы якіх займаюць вызначальнае месца ў выяўленчым мастацтве Беларусі. Яго творчасць называюць летапісам эпохі. У сваіх творах Леанід Шчамялёў заўжды шчыра захапляўся краявідамі родный Беларусі, ствараючы ўзнёслыя, паэтычныя вобразы роднай зямлі і яе жыхароў. Яго творчасці былі характэрныя сур’ёзныя вобразна-пластычныя пошукі, імкненне да спасціжэння свету, да думак аб сутнасці гэтага свету.
Леанід Дзмітрыевіч Шчамялёў нарадзіўся 5 лютага 1923 года ў Віцебску. Удзельнік Вялікай Айчыннай вайны. У баях за Беларусь быў цяжка паранены.
Скончыў Мінскае мастацкае вучылішча (1952), Беларускі дзяржаўны тэатральна-мастацкі інстытут (1959). Вучыўся ў Віталя Цвіркі.
Удзельнік мастацкіх выставак з 1958. Працаваў ва ўсіх жанрах станковага жывапісу, бліскучы малявальшчык.
Выкладаў малюнак у Мінскім мастацкім вучылішчы (1959-1967) і Рэспубліканскай школе-інтэрнаце музыкі і выяўленчага мастацтва (1967-1974).
Шмат разоў быў абраны на кіруючыя пасады Саюза мастакоў БССР (першы сакратар праўлення 1977-1983, старшыня Рады Беларускага саюза мастакоў 2002-2005) і быў сакратаром Саюза мастакоў СССР і старшынёй Мастацкага фонду БССР (1983-1987).
Народны мастак БССР (1983). Лаўрэат Дзяржаўнай прэміі Беларусі (1982) і прэміі Саюзнай дзяржавы Беларусі і Расіі ў галіне літаратуры і мастацтва (2010). Кавалер ордэна Францыска Скарыны (2001) i многіх іншых узнагарод, у тым ліку ордэнаў “Айчынная вайна» 1-й і 2-й ступеняў.
З 2003 года ў Мінску працуе гарадская карцінная галерэя твораў Леаніда Шчамялёва.
Карціны Леаніда Шчамялёва экспанавалі ў Канадзе, ЗША, Францыі, Італіі, Ізраілі, Фінляндыі, Германіі, Аўстрыі, Іспаніі, іх набывалі вядомыя галерэі і музеі. Творы знаходзяцца ў Нацыянальным мастацкім музеі Беларусі, Траццякоўскай галерэі ў Маскве, ва ўсіх абласных краязнаўчых музеях Беларусі.
