СЯБРЫ!
Некалькі словаў пра ўзаемадзеянне Беларускага саюза мастакоў з дзяржаўнымі органамі ўлады.
Беларускі саюз мастакоў – грамадская арганізацыя. Але так ці інакш яна ўпісана ў сістэму культуры краіны, а дзяржава – адзін з рэальных заказчыкаў…
Два гады таму на 9 мая кіраўніцтва Саюза паехала ў майстэрню да народнага мастака Беларусі Леаніда Шчамялёва, каб павіншаваць яго са святам Перамогі. Леанід Дзмітрыевіч сказаў тады: “Трэба быць разам з дзяржавай, без гэтага нічога не атрымаецца”.
Сапраўды, сёння ўзаемадзеянне Беларускага саюза мастакоў з дзяржавай паступова вяртаецца да кропкі, калі яна была на піку. Калісьці Пётр Машэраў быў госцем мастацкіх майстэрняў на Сурганава ў Мінску, наведваў Палац мастацтва. Тады, дзякуючы яго падтрымцы і майстэрні для мастакоў, з’явілася і яшчэ шмат чаго. Мадэль, якая тады сфарміравалася, мела плён.
Сёння мы на ўсіх узроўнях кантактуем з прадстаўнікамі дзяржструктур – з Міністэрствам культуры, з Міністэрствам замежных спраў, з мясцовымі органамі ўлады. Калі адкрываем буйны праект – запрашаем кіраўніцтва краіны. Магу прывесці ў прыклад выставу, прысвечаную мітрапаліту Філарэту, якую наведала Наталля Качанава і шмат службовых асоб.
Саюз мастакоў праводзіць за год каля 500 мерапрыемстваў – ад персанальных выставак да міжнародных. У тры разы павялічылася інтэнсіўнасць выставачнай дзейнасці ў параўнанні з мінулым годам, нягледзячы на тое, што ёсць пэўныя эканамічныя абставіны. Як ні дзіўна, але закрыццё межаў з-за пандэміі паспрыяла таму, што акумуляцыя творчай энергіі пайшла ўнутры краіны.
І яшчэ. Мы шмат апошнія два гады гаворым пра патрыятычнае выхаванне. Яно можа адбывацца літаральна вакол нас. У той жа савецкі час нават прыпынкі афармляліся патрыятычнай тэматыкай, рабіліся пано, рэльефы, плакаты. Пэўная частка будынкаў вылучалася пад культурнае афармленне, і гэтая прастора напаўнялася правільнымі працамі.
Гэта пра тое, што нават не трэба шукаць і прыдумляць замовы, а дастаткова ствараць візуальны шэраг у новых будынках. Калі чалавек глядзіць кожны дзень на пано ў выглядзе карты Беларусі ў пад’ездзе свайго дома, ці на пано з нашымі гістарычнымі асобамі ў другім, то ў яго падсвядомасці будзе замацоўвацца выява краіны, у якой ён жыве, яе каштоўнасці!
Старшыня Беларускага саюза мастакоў
Глеб Отчык
