Выстава «МІЖ НАМІ/INTER NOS» адкрыта ў Палацы мастацтва 28 красавіка і працуе да 15 мая 2021 года.
АЛЕНА БОХАН, мастацтвазнаўца, куратар выставы: “Экспазіцыя, якая носіць назву МІЖ НАМІ/INTER NOS, з’яўляецца ў пэўнай ступені эксперыментам. Яна не адпавядае фармату традыцыйных выстаў, што ладзяцца да ўгодкаў сяброў Беларускага саюза мастакоў.
Аўтары, якія адзначаюць у 2021 годзе сваё пяцідзесяцігоддзе – Ігар Гардзіёнак, Павел Татарнікаў, Аляксандр Шаппо, Сяргей Шэмет, – вырашылі аб’яднацца для стварэння сумеснай экспазіцыі. Ідэя прадставіць свае работы разам на адной пляцоўцы на першы погляд не відавочная, але цалкам натуральная, бо мастакі ведаюць адзін аднаго з маленства, калі пачалі навучанне ў Рэспубліканскай школе-інтэрнаце па музыцы і выяўленчаму мастацтву, знакамітым “Парнаце”. Усе чацвёра вучыліся і ў Беларускай дзяржаўнай акадэміі мастацтваў, набылі трывалы падмурак для творчага развіцця.
Кожны з аўтараў здзейсніўся як паспяховы мастак, кожны мае адметны досвед і непаўторную пазнавальную манеру. Аднак, нягледзячы на абсалютную арыгінальнасць падыходаў, непадобнасць асабістых установак, прынцыпаў работы, іх яднае моцны імпульс, зададзены самім часам прафесійнага станаўлення. Мастакам пакалення, якое сталела на зломе эпох, уласцівыя імкненне да рэфлексіі і пошук тоеснасці.
У экспазіцыі глядач не знойдзе звычайнай логікі юбілейных выстаў, бо гэта не рэтраспекцыя. Кожны з мастакоў вызначыў творы, якія выяўляюць сутнасць уласнага творчага метаду і ўвасабляюць памкненні і ідэі, што актуальныя менавіта на сённяшнім этапе. Выставачная прастора не прадугледжвае дакладна зададзенага сцэнару і паслядоўнага перамяшчэння ад аднаго раздзела да іншага. Зрэшты, глядач можа свабодна ўступаць у дыялог з аўтарамі або назіраць за іх разважаннямі.”
