У Лагойску ў Мастацкай галерэі імя С.Давідовіча працуе з 16 студзеня па 10 лютага 2024 г. персанальная выстава Юрыя Крупянкова «Старонкі памяці. Маё мястэчка», прысвечаная Міжнароднаму Дню памяці ахвяр Халакоста.
Выстава з’яўляецца лагічным працягам праекта «Ціхая мелодыя нашых мястэчак», ужо прадстаўленага раней у шэрагу гарадоў Беларусі, а таксама ў Літве. Праект прысвечаны знікламу свету яўрэйскіх мястэчак нашай краіны, памяць аб якім жыве ў сэрцы мастака.
У экспазіцыю ўвайшлі жывапісныя творы аўтара: жанравыя кампазіцыі, партрэты і пейзажы, якія адрозніваюцца вялікай выразнасцю і праніклівасцю. Светлым сумам прасякнуты палотны, героі якіх – шавец, кравец, музыканты, крамніца… Гэта прыгожы, ідэалізаваны свет яўрэйскіх мястэчак Беларусі.
Асобны блок экспазіцыі прысвечаны Халакосту, работы, прадстаўленыя ў ім, рэзка адрозніваюцца сваёй журботнай каляровай гамай і настроем. «Я памятаю, я не забыўся…», — быццам бы кажа нам мастак гэтай серыяй палотнаў.