ГАЛЕРЭЯ «МАСТАЦТВА»
прадстаўляе выставу керамікі Вольгі Сямашка і Ганны Амбросавай “ЧБ”
27.02/16.03.2024
У экспазіцыі керамічных работ Вольгі Сямашка і Ганны Амбросавай, якія працуюць у тандэме больш за 10 гадоў, даследуецца і распрацоўваецца ахраматычная палітра не толькі ў ракурсе каларыстыкі, але і ў кантэксце філасофскага ўсведамлення гэтых двух колераў. Асацыіраваныя ў розных культурах з кардынальна рознымі з’явамі і традыцыямі, гэтыя два колеры і іх мноства варыяцый ствараюць свой уласны свет манахроміі.
Аўтары разважаюць на тэму таго, як абмежаванне ў колеры надае твору, прадмету новыя якасці: пазбаўляе форму магчымасці набыцця залішняй дэкаратыўнасці і надае кампазіцыйную абагуленасць, фармальнасць вырашэння нават складаным структурам.
Экспазіцыя адказвае на пытанні, як колер ці яго адсутнасць уплываюць на чытанне і ўспрыняцце аб’екта гледачом, як монахромныя творы арганізуюць і рэарганізуюць прастору і як шматвяковыя тэхналагічныя традыцыі трактуюцца і перараджаюцца ў сучасных формах.
