У музеі В.К. Бялыніцкага-Бірулі да 4 сакавіка працуе выстава з фондаў Нацыянальнага мастацкага музея «Край белых буслоў. Выявы радзімы ў творах беларускіх мастакоў ХХ-ХХІ стст.»
У ХХ–ХХI стагоддзях да тэмы радзімы ў пейзажным жывапісе звярталіся многія беларускія мастакі. Для іх твораў характэрна злучэнне лірычнага пачатку і эпічны ахоп свету. Жывапісцам было важна, грунтуючыся на канкрэтнай мясцовасці, якая станавілася аб’ектам адлюстравання, стварыць абагульненую эпічную выяву роднага краю (Я. Зайцаў, Ул. Кудрэвіч, В. Цвірка, В. Грамыка, Д. Алейнік, Г. Вашчанка, Л. Шчамялёў і інш.). Адчуванне адзінства ўнутранага свету чалавека і прыроды, пачуццё непарыўнай сувязі з зямлёй знаходзіла адлюстраванне ў творах беларускіх майстроў, дзе створаны па-філасофску змястоўныя, сімвалічна насычаныя вобразы роднай прыроды.
Многія жывапісцы, графікі, скульптары на працягу некалькіх стагоддзяў звароту да гэтай тэмы ўнеслі важны ўклад у фарміраванне мастацкага аблічча нашай радзімы ў выяўленчым мастацтве.