20 ліпеня а 17-й гадзіне ў Нацыянальным мастацкім музеі Рэспублікі Беларусь адбудзецца адкрыццё персанальнай выставы жывапісу Ганны Садоўскай «Шляхі творчасці».
Ганна Садоўская належыць да маладога пакалення беларускай школы пейзажнага жывапісу. Для твораў Ганны характэрныя гарманічны каларыт, панарамная шматпланавасць, лірычнасць, натуральнасць і духоўнасць вобраза роднай зямлі. Такі выбар выяўленчай мовы вызначаны ўстойлівымі традыцыямі нацыянальнай школы пейзажа і досведам пленэрнай практыкі: менавіта дзякуючы пастаяннаму ўдзелу ў сезонных пленэрах пейзажы мастака па-асабліваму натуралістычныя. Беларуская прырода ў прадстаўленых на выставе творах існуе як самадастатковае цэлае, як аб’ект адвечнай прыгажосці.
Ганна Садоўская нарадзілася ў 1997 годзе ў Мінску. У 2021 годзе скончыла Беларускую дзяржаўную акадэмію мастацтваў (аддзяленне станковага жывапісу). Магістр мастацтвазнаўства (Інстытут падрыхтоўкі навуковых кадраў НАН Беларусі, 2022 г.). У цяперашні час праходзіць навучанне ў аспірантуры па спецыяльнасці “Выяўленчае і дэкаратыўна-прыкладное мастацтва і архітэктура” ў Цэнтры даследаванняў беларускай культуры, мовы і літаратуры НАН Беларусі.
З 2014 года з’яўляецца пастаянным удзельнікам выстаў у Беларусі і за мяжой. Творы Ганны Садоўскай знаходзяцца ў прыватных калекцыях Беларусі, Расіі, Кітая і іншых краін.
У экспазіцыі прадстаўлена каля 30 творчых прац мастака, створаных за апошнія гады, пераважна на пленэрах.