Эдуард Астаф’еў нарадзіўся ў г.Хімкі Маскоўскай вобласці 23 сакавіка 1942 года, аднак лёс звязаў яго з Беларуссю. Пасля заканчэння вучобы ў 1972 годзе ў Беларускім дзяржаўным тэатральна-мастацкім інстытуце (цяпер – Беларуская дзяржаўная акадэмія мастацтваў), дзе яго выкладчыкамі былі народныя мастакі БССР А. Бембель і А. Глебаў, ён прысвяціў сваё жыццё і творчасць беларускай культуры.
З 1978 г. Эдуард Астаф’еў – сябра Беларускага саюза мастакоў.
Вынікам творчай дзейнасці сталі:
- тры манументальныя комплексы, устаноўленыя ў розных населеных пунках Беларусі, прысвечаныя Вялікай Айчыннай вайне;
- манументы Францыску Скарыне ў Празе (Чэхія) і Раману Шаціле (Светлагорск);
- шэраг партрэтных бюстаў гістарычных дзеячаў у Беларусі і Расіі;
- больш 20-ці мемарыяльных дошак (М.Багдановічу, П.Пестраку, К.Кірыенку) у Мінску і іншых беларускіх гарадах;
- медалі – Ф.Скарыне, А.Куляшову, К.Каліноўскаму.
Удзельнік міжнародных выстаў у Расіі, Эстоніі, Латвіі.
Творы Эдуарда Астаф’ева знаходзяцца ў Нацыянальным мастацкім музеі Рэспублікі Беларусь, Нацыянальным гістарычным музеі Рэспублікі Беларусь, Музеі Вялікай Айчыннай вайны, Музеі сучаснага выяўленчага мастацтва, Магілёўскім абласным мастацкім музеі імя П. Масленікава, Літаратурным музеі М. Багдановіча, у мастацкім фондзе Беларускага саюза мастакоў.