14 студзеня споўнілася б 85 гадоў народнаму мастаку Беларусі Васілю Пятровічу Шаранговічу (14.01.1939 – 31.12. 2021).
Васіль Шаранговіч з плеяды тых, хто вызначаў выяўленчае мастацтва нашай краіны. Ён прыйшоў у беларускае мастацтва ў канцы 1960-х гг. у час росквіту кніжнай графікі ў Савецкім Саюзе, калі былі запатрабаваны сур’ёзныя, шматфігурныя, высокапрафесійныя ілюстрацыі да класічных твораў.
Яго па праву называюць стваральнікам школы беларускай графікі. Васіль Шаранговіч скончыў Беларускі дзяржаўны тэатральна-мастацкі інстытут, шмат гадоў выкладаў у альма-матэр (1967 – 1997), дарос да прафесара, загадчыка кафедры, рэктара гэтай навучальнай установы. У многім дзякуючы менавіта яму тэатральна-мастацкі інстытут атрымаў статус акадэміі. З 1998 па 2008 быў дырэктарам новага мінскага Музея сучаснага выяўленчага мастацтва.
Васіль Шаранговіч памёр праз два дні пасля сваёй жонкі. Пахаваны на Усходніх могілках у Мінску.
