16 сакавіка 2023 года ў выставачным корпусе Нацыянальнага мастацкага музея Рэспублікі Беларусь (вул. К. Маркса, 24) пачынае працу выставачны праект “Віталь Канстанцінавіч Цвірка. Да 110-годдзя з дня нараджэння”. У экспазіцыі будуць прадстаўлены творы жывапісу і графікі са збору Нацыянальнага мастацкага музея Рэспублікі Беларусь, Беларускага саюза мастакоў, а таксама з прыватных калекцый.
Віталь Канстанцінавіч Цвірка нарадзіўся 14 лютага (1 лютага па старым стылі) 1913 года ў вёсцы Радзеева Буда-Кашалёўскага раёна (Гомельская вобласць). Прафесійную адукацыю Віталь Канстанцінавіч Цвірка (1913–1993) атрымаў у Віцебскім мастацкім тэхнікуме, потым у Маскоўскім дзяржаўным мастацкім інстытуце. Вучыўся ў такіх мэтраў, як Сяргей Герасімаў, Георгій Ражскі, Пётр Пакаржэўскі. У 1946 годзе Віталь Цвірка ўступіў у Саюз мастакоў БССР. З 1947 года пачынаецца яго выкладчыцкая дзейнасць у Мінскім мастацкім вучылішчы, потым у Беларускім дзяржаўным тэатральна-мастацкім інстытуце (зараз – Беларуская дзяржаўная акадэмія мастацтваў), рэктарам якога Віталь Канстанцінавіч з’яўляўся ў 1958–1960 гадах. Многія з яго вучняў сталі вядомымі жывапісцамі, якія нясуць сваё непаўторнае слова ў мастацтве, кожны са сваім індывідуальным, вядомым почыркам: гэта Леанід Шчамялёў, Дзмітрый Алейнік, Барыс Аракчэеў, Мікалай Казакевіч, Георгій Паплаўскі, Іван Рэй і інш.
Віталь Цвірка звяртаўся да шматлікіх жанраў: інтэр’ер, партрэт, сюжэтна-тэматычная карціна, нацюрморт, але безумоўным фаварытам у яго творчасці стаў пейзаж, дзе мастак раскрыў сябе па-сапраўднаму ярка, магутна і ўсебакова. Панарамнасць кампазіцыі, свабодная жывапісная манера пісьма, шырокі, тэмпераментны мазок, насычанасць колеравай палітры, кантрастнасць – асноўныя рысы, уласцівыя яго работам у жанры пейзажа. Мастак перадае някідкую прыгажосць беларускай прыроды, напаўняючы простыя матывы то лірыка-паэтычным гучаннем, то надзяляючы багатырскай моцай быліннага эпасу, а нярэдка і злучаючы іх – камернасць і эпічнасць – у адзіным палатне-гімне роднай зямлі.
Мастак вёў вельмі актыўную выставачную дзейнасць у Беларусі і за яе межамі. Быў удастоены ганаровых званняў “Народны мастак БССР” (1963), “Лаўрэат Дзяржаўнай прэміі БССР” (1967), узнагароджаны ордэнам Дружбы народаў і медалём Францыска Скарыны.
Творы Віталя Канстанцінавіча Цвіркі захоўваюцца ў Нацыянальным мастацкім музеі Рэспублікі Беларусь, Нацыянальным цэнтры сучасных мастацтваў Рэспублікі Беларусь, Беларускім дзяржаўным музеі гісторыі Вялікай Айчыннай вайны, краязнаўчых музеях Беларусі, фондах Беларускага саюза мастакоў, Дзяржаўнай Траццякоўскай галерэі, прыватных калекцыях.