Імя Кастуся Качана ў беларускім сучасным выяўленчым мастацтве перш за ўсё звязваюць з развіццём традыцый пейзажнага жанру.
Пейзаж у беларускім мастацтве займае асаблівае месца, беларускія творцы знаходзілі і зараз знаходзяць у ім найбагацейшыя магчымасці для творчых выказванняў, сярод якіх асноўнымі з’яўляюцца прызнанні ў любові да роднай зямлі.
На працягу ўжо доўгіх гадоў мастак апявае прыгажосць роднага краю: яго прыроду, размеранае жыццё невялікіх гарадоў і вёсак, гісторыю, якая увасобілася ў архітэктурных помніках, храмах і манастырах.
Вялікая частка творчай спадчыны жывапісца прысвечана менавіта Навагрудчыне. Увага да натуры, адвольная манера жывапісу, мяккія каларыстычныя спалучэнні характэрны для аўтарскай манеры Кастуся Качана. Багацце палітры мастацкіх вобразаў аўтара перш за ўсё будуецца на надзяленні асаблівым сімвалізмам акаляючага асяроддзя і на непасрэдным адлюстраванні эмоцый.
Шчырае “зачараванне” убачаным мастак вылівае на свае палотны, што не пакідае абыякавым і гледача.
