З 20 ліпеня 2023 года ў Рэспубліканскай мастацкай галерэі Беларускага саюза мастакоў «Палац мастацтва» (Казлова 3) пачне сваю работу выстава, арганізаваная секцыяй графічнага дызайну Беларускага саюза мастакоў — «Формы. Дыялогі». На выставе будуць прадстаўлены творы графікі, фатаграфіі і дызайну. Экспазіцыя аб’яднае ў сабе пяць персанальных выставак, аўтары якіх прадставяць свае зусім розныя па форме і зместу работы і праекты.
Форма — гэта найважнейшы элемент твораў мастацтва: графікі, жывапісу, фатаграфіі, дызайну і архітэктуры. Мастак, дызайнер увасабляе свае ідэі, думкі, пачуцці і эмоцыі праз формы. Даследаванне магчымасці формаў, іх характару і спосабу стварэння прыводзіць мастака да магчымасці больш глыбокага і тонкага раскрыцця зместу, закладзенага ў яго творы. Бо форма не абмежавана выявай рэальнага аб’екта, яна можа існаваць і без яго. Разуменне такой формы не заўсёды простая задача, але надзвычай займальная. Уступаючы ў дыялог з мастаком, дыялог не вербальны, а візуальны, мы вядзем гутарку праз успрыманне формы, задаём пытанні і атрымліваем адказы, вучымся разважаць, атрымліваем новы пачуццёвы досвед і ўражанні.
На выставе можна будзе ўбачыць арыгінальныя, эксперыментальныя творы фатаграфіі Уладзіміра Цярэнцьева і Ганны Мельнікавай; канцэптуальныя, эстэтычна тонкія дызайнерскія праекты Руслана Найдзена; паэтычныя і высокамастацкія графічныя работы Уладзіміра Васюка; свет знакаў і сімвалаў у эмацыйна магутных творах графікі і экспрэсіўнай каліграфіі Віктара Сянькова.
У гледача будзе магчымасць уступіць у дыялог з аўтарамі праз створаныя імі формы і заключаныя ў іх сэнсы, зразумець, што формы могуць размаўляць без слоў.