15 жніўня (аўторак) 2023 г. а 18 гадзіне ў мастацкай галерэі Беларт мае адбыцца адкрыццё персанальнай выставы жывапісу Андрэя Карпянкова « PALISSADE / КВЕТНІК».
Андрэй Карпянкоў, мастак-жывапісец, выкладчык. Жыве і працуе ў г.Мінску. У 2008 г. скончыў кафедру “жывапіс” Беларускай дзяржаўнай акадэміі мастацтваў. З 2010 г. выкладае ў Мінскім дзяржаўным мастацкім каледжы імя А.К.Глебава. З 2018 г. сябра ГА “Беларускі саюз мастакоў”.
Палісаднік, кветнік, агародчык…у розных рэгіёнах Беларусі яго называюць па свойму. Але гэта тое месца, дзе здаўна людзі стваралі своеасаблівы куточак раю — канцэнтрат прыгажосці з улюбёнымі раслінамі. Вырошчванне кветак у агародчыку — цікавы пласт культуры беларускага народу, здольны натхняць мастакоў. Праз дзесяцігоддзі наша памяць захоўвае водар і выгляд тых кветак, якія вырошчвалі бабулі і матулі. А ўспаміны дзяцінства часта ўтрымліваюць эпізоды з касьбой, зборам палявых або лекавых кветак, пляценнем вянкоў.
І ў сучасным жыцці букеты суправаджаюць самыя важныя падзеі чалавека: дні народзін, святы, спатканні і развітанні. У кожнага чалавека маюцца свае асацыятыўныя шэрагі з пэўнымі кветкамі і іх пахам… У творах Андрэя Карпянкова букеты паказаны дастаткова ўмоўна, што значна пашырае поле інтэпрэтацый гледачом. Кветнік разбіваўся заўжды ў прасторы паміж хатай і плотам і з’яўляўся пэўнай абярэгавай зонай паміж знешнім светам і ўласнай хатняй тэрыторыяй гаспадара. Тэму хаты, як кропкі адліку, развіваюць тыя работы Андрэя Карпянкова на якіх адлюстравананы вясковыя двары з пабудовамі і садамі. Выявы спалучаюцца з дэкаратыўнымі фрагментамі, што нагадваюць традыцыйныя беларускія тканыя посцілкі.