15 ліпеня 2023 года на 71 годзе пасля цяжкой хваробы пайшоў з жыцця ШЫЛКО ВІКТАР АЛЯКСАНДРАВІЧ, мастак-жывапісец, сябра Віцебскай абласной арганізацыі Беларускага саюза мастакоў.
Выказваем шчырае спачуванне родным і блізкім мастака.
Віктар Шылько нарадзіўся 17 ліпеня 1952 года. Скончыў у 1974 годзе мастацка-графічны факультэт Віцебскага педагагічнага інстытута.
З 1986 года – член Беларускага саюза мастакоў. З 1987 года – член творчага аб’яднання «Квадрат».
Працаваў пераважна ў тэхніцы станковага жывапісу. Мастак імкнуўся распазнаць сутнасць пластычнай прасторы, без якой няма мастацтва жывапісу.
Творы мастака знаходзяцца ў Нацыянальным мастацкім музеі, Музеі сучаснага мастацтва ў Мінску, Віцебскім абласным мастацкім музеі, Цэнтры сучаснага мастацтва, Музеі Марка Шагала, Музеі сучаснага еўрапейскага мастацтва (г. Сеул, Карэя), а таксама ў прыватных калекцыях.