12 кастрычніка ў 18.00 у Рэспубліканскай мастацкай галерэі “Палац мастацтва” (вул.Казлова, 3) адкрыецца рэспубліканская мастацкая выстава “Viva Kola Art”. Гэта сумесны праект Беларускага саюза мастакоў і Веласіпеднага клуба “Мінск”.
Аснову экспазіцыі складуць лепшыя работы ўдзельнікаў мастацкага конкурсу “Viva Kola Art”. Конкурс праводзіцца сярод мастакоў, фатографаў, дызайнераў з мэтай развіцця і папулярызацыі веласіпеднага спорту, веласіпеднага руху і прапаганды здаровага ладу жыцця праз нацыянальнае выяўленчае мастацтва, для прыцягнення да яго ўвагі шырокіх слаёў грамадства.
“Веласіпедны клуб “Мінск” 20 верасня адзначыў сваё 10-годдзе, таму адзін з паверхаў выставы будзе поўнасцю прысвечаны гісторыі клуба. Але галоўнымі, зразумела, стануць работы ўдзельнікаў конкурсу, які праходзіць у сямі намінацыях: “Скульптура”, “Графіка”, “Жывапіс”, “Дэкаратыўна-прыкладное мастацтва”, “Арт-аб’ект», “Фатаграфія” і “Творчы дэбют”. На працягу месяца мы будзем прадстаўляць нашу выставу, а пасля падвядзем вынікі і вызначым пераможцаў, якія атрымаюць прызы”, — зазначыў дырэктар веласіпеднага клуба “Мінск” Аляксей Іваноў.
Удзел у конкурсе бяруць сталыя, вядомыя мастакі і творчая моладзь з усіх абласных гарадоў Беларусі, а таксама з Баранавіч, Бабруйска, Жлобіна, Маладзечна, Салігорска. Сярод іх — прафесіяналы і аматары, якія актыўна ўдзельнічаюць у выставачнай дзейнасці, а таксама студэнты БДАМ, навучэнцы мастацкага каледжа імя А. Глебава, мастацкага каледжа імя І. Ахрэмчыка. Усяго больш за 200 чалавек. Пераможцы конкурсу будуць аб’яўлены 11 лістапада.
Падобны праект рэалізаваны ўпершыню. У рамках выставы будзе прадстаўлена гісторыя вядучага прафесійнага веласіпеднага клуба краіны — велаклуба “Мінск”. Рэспубліканскае грамадскае аб’яднанне калекцыянераў (БелРААК, Мінск) падрыхтавала сваю экспазіцыю “Азбука Мінска”, а прыватны калекцыянер Андрэй Камоска азнаёміць наведвальнікаў выставы з гісторыяй развіцця Мінскага мотавелазавода.
Рэспубліканскі мастацкі конкурс “Viva Kola Art” — гэта крок на шляху да сінтэзу веласпорту і мастацтва, а дакладней веласіпеда як інструмента, які аб’ядноўвае людзей рознага ўзросту, нацыянальнасцей і прафесій.