З 1 лістапада ў Нацыянальным мастацкім музеі Рэспублікі Беларусь працуе выстава па выніках VIII Міжнароднага мастацкага пленэру “Святасць зямлі беларускай”, прысвечанага 850-годдзю прастаўлення прападобнай Еўфрасінні Полацкай і Году міру і стварэння.
Светлы вобраз прападобнай Еўфрасінні, апякункі і нябеснай заступніцы зямлі беларускай, – вечны сімвал міралюбнасці, пакорлівасці, лагоднасці і любві да бліжніх. Падзвіжніцкая дзейнасць святой Еўфрасінні, заснаванне манастыроў і храмаў, якія сталі цэнтрамі асветы ў Полацкім княстве, стварэнне па просьбе Еўфрасінні духоўнай святыні Беларусі напрастольнага Крыжа-каўчэга, пераклад і стварэнне рукапісных копій богаслужэбных кніг – вызначальныя, знакавыя падзеі ў гісторыі культуры Беларусі.
Арганізатары пленэру – Беларуская Праваслаўная Царква, ГА “Беларускі саюз мастакоў”, ГА “Беларускі саюз жанчын”, ГА “Беларускі саюз журналістаў”, ТАА “БелінжынірынгбудІнвест”.
У праекце прынялі ўдзел мастакі з Беларусі, Расіі і Малдовы. Сярод удзельнікаў – такія вядомыя майстры, як Глеб Отчык, Анатоль Отчык, Галіна Конанава, Аксана Еўдакіменка, Юрый Язан і інш., а таксама і маладыя мастакі – Ганна Садоўская, Марта Шчэрбіч. Складанай часткай праекта стаў рэспубліканскі конкурс дзіцячага малюнка.
У рамках пленэру ў Спаса-Еўфрасіннеўскай царкве ў Івянцы адбылося ўрачыстае асвячэнне памятнага знака ў гонар 850-годдзя блажэннага скону прападобнай Еўфрасінні, ігуменні Полацкай. Удзельнікі пленэру наведалі Спаса-Еўфрасіннеўскі жаночы мітрапаліцкі манастыр у Полацку, пазнаёміліся з праваслаўнымі святынямі Полацка, пабывалі ў Івянецкім доме-інтэрнаце для дзяцей з асаблівасцямі развіцця, дзе ўдзельнікаў пленэру чакалі канцэрт выхаванцаў установы і знаёмства з жывапіснымі работамі дзяцей. Быў арганізаваны таксама дабрачынны аўкцыён, сродкі ад якога пайшлі на рэалізацыю сацыяльнага дабрачыннага праекта “Мастакі – дзецям лета”.
На выставе па выніках пленэру прадстаўлена каля 50 твораў: пейзажы, нацюрморты, сюжэтныя і сімвалічныя кампазіцыі. Частка работ прысвечана жыццёваму шляху прападобнай Еўфрасінні Полацкай. Таксама будуць паказаны 30 работ пераможцаў рэспубліканскага конкурсу дзіцячага малюнка, праведзенага ў рамках пленэру.