Шаноўныя сябры!
Вось і мінулі тры гады нашай працы разам з вамі! Гэтыя тры гады былі надзвычай складанымі і напружанымі. Свае карэктывы ўнесла пандэмія, з-за якой з жыцця пайшло шмат выдатных сяброў нашага саюза, сярод якіх – многа лепшых прадстаўнікоў старэйшага пакалення. На нашых вачах ад нас па-сутнасці адыйшла цэлая эпоха ў беларускім мастацтве.
З-за пандэміі амаль недасягальным стаў для нас удзел у замежных выставах і пленэрах, зніклі былыя магчымасці продажу работ у заходніх галерэях, рэзка памяньшыліся міжнародныя сувязі.
За гэтыя тры гады давялося вырашаць складаныя эканамічныя пытанні, якія найперш звязаны з працай унітарных прадпрыемстваў Саюза мастакоў, а таксама з утрыманнем уласнасці саюза ў належным выглядзе.
Але пры гэтым мне прыемна канстатаваць, што Беларускі саюз мастакоў здолеў застацца моцнай арганізацыяй, у якой найважнейшым
складнікам дзейнасці застаецца творчасць нашых сяброў. Сведчанне гэтаму – велізарная колькасць выстаў, якая адбылася за справаздачны перыяд у Мінску на нашых выставачных пляцоўках – у Рэспубліканскай мастацкай галерэі “Палац мастацтва”, у галерэях салонаў-магазінаў “Мастацтва”
і “Беларт”. І велізарная колькасць гледачоў, у тым ліку шмат маладзёвага ўзросту, якія наведвалі нашы выставачныя праекты.
Хачу сказаць вялікія словы ўдзячнасці ўсім, хто быў побач са мною гэтыя тры гады і дапамагаў рухаць уперад справу Беларускага саюза мастакоў: маім намеснікам, усяму працоўнаму калектыву саюза, старшыням секцый, якія працавалі шчыра і з энтузіязмам, усім вам, сябры саюза, за тое, што падтрымлівалі любыя нашы ініцыятывы!