Віншуем!
Мішчанку Мікалая Яўгенавіча, вядомага беларускага мастака-жывапісца, сябру Беларускага саюза мастакоў секцыя «Традыцыя», лаўрэата прэміі Саюза рускіх мастакоў «За ўклад у развіццё рэалістычнага мастацтва», з 75-годдзем!
Мікалай Мішчанка – прыхільнік традыцыйнай прафесійнай мастацкай школы, уся яго творчасць звернута да лепшых жывапісных традыцый. Асноўныя жанры, у якіх працуе мастак — пейзаж і нацюрморт.
Працуючы ў непасрэдным кантакце з прыродай, мастак па-майстэрску перадае на палатне ледзь прыкметныя адценні і паўтоны, якія ў штодзённым жыцці мы і не заўважаем. Майстар стварае рэалістычныя, простыя, выразна выбудаваныя кампазіцыі.
Мікалай Мішчанка нарадзіўся 21 лютага 1949 года ў горадзе Магілёве. У 1974 годзе скончыў мастацка-графічны факультэт Віцебскага дзяржаўнага педагагічнага інстытута. Работы знаходзяцца ў Нацыянальным мастацкім музеі, Музеі сучаснага выяўленчага мастацтва, Магілёўскім абласным мастацкім музеі, у Буда-Кашалёўскай карціннай галерэі, Светлагорскай карціннай галерэі.
