Леанід Шчамялёў — фігура для нашай краіны знакавая. Франтавік, народны мастак Беларусі, ён стаў легендай яшчэ пры жыцці. А жыццё, у тым ліку творчае, выдалася доўгім і плённым. Выбітны майстар сышоў ад нас два гады таму, ледзь не дажыўшы да 98 гадоў і да апошніх дзён пагружаны ў працу. І выставу ў гонар свайго 100‑годдзя планаваў адчыняць сам. Знакавая дата прыпадае на 5 лютага. Але выставы, акцыі і іншыя ўрачыстыя падзеі ў гонар юбілею выбітнага мастака сучаснасці будуць праходзіць на працягу ўсяго года.
Старшыня Беларускага саюза мастакоў Глеб Отчык:
— Леанід Шчамялёў — гэта сапраўды чалавек-эпоха, гэта патрыярх, знакаміты мастак, які ўнёс значны ўклад у развіццё беларускага мастацтва. Усе мы ім ганарымся – не толькі саюз мастакоў, але і ўся наша творчая супольнасць, увесь наш беларускі народ. Жыццё яго твораў працягваецца, і, вядома, мы будзем святкаваць гэтую дату.
— Сёлета ў нас не адна юбілейная дата, а дзве — галерэя Леаніда Шчамялёва таксама святкуе 20-годдзе, — адзначыла загадчыца Галерэі мастацтваў Леаніда Шчамялёва Ганна Ясюк. — Што да экспазіцыі, уся галерэя зараз выкарыстоўваецца пад гэтую выставу: дзевяць залаў, якія мы размеркавалі па тэмах. Першая і, мусіць, найважнейшая — партрэты родных і блізкіх Леаніда Дзмітрыевіча, ваенная тэма, нацюрморты, пейзажы…
Да юбілею ў выдавецтве «Беларусь» у серыі «Славутыя мастакi з Беларусi» выйшла кніга вядомага беларускага мастацтвазнаўцы Барыса Крэпака, прысвечаная Леаніду Шчамялёву.
— Я сябраваў з гэтым чалавекам 55 гадоў, — распавёў мастацтвазнаўца. — І падлічыў, што за гэтыя гады падрыхтаваў дзесяць выданняў пра Леаніда Дзмітрыевіча, у тым ліку тры каталогі (адзін у Маскве) і кнігі, альбомы, якія друкаваліся ў выдавецтвах «Беларусь», «Мастацкая лiтаратура»… Шчамялёў мяне падсілкоўваў і шмат чаму навучыў. Я ад пачатку да канца бачыў, як ствараліся яго работы — як яны нараджаліся і выходзілі з майстэрні, пачынаючы ад белага чыстага палатна і канчаючы выставачнай залай.
Дакументальны фільм пра Леаніда Шчамялёва зараз рыхтуюць у майстэрні Уладзіміра Бокуна. Праект знаходзіцца на стадыі мантажу.
— Фільм, які мы здымаем, ствараецца на замову тэлеканала АНТ пры актыўным удзеле галерэі Шчамялёва і Нацыянальнага мастацкага музея, — распавёў кіраўнік кінастудыі Уладзімір Бокун. — Ён выйдзе ў серыі «Ад першай асобы»: да гэтага ў ёй ужо выходзілі праекты пра Максіма Танку і Якуба Коласа. Гэта фільмы, заснаваныя на асабістых успамінах. Карціна аб Шчамялёве была задумана ў мінулым годзе. Праца вельмі няпростая, мантаж заканчваецца, толькі што зьявілася назва, мы доўга над ім думалі: «Леанід Шчамялёў. Усе адценні белага». Прэм’ера пройдзе на тэлеканале ОНТ у лютым.
