У ноч з 12 на 13 студзеня 2024 года ва ўзросце 65 гадоў раптоўна пайшоў з жыцця вядомы беларускі фотамастак, крытык і аналітык фотамастацтва, куратар выставачных праектаў, сябра секцыі мастацтвазнаўства і крытыкі Беларускага саюза мастакоў ПАРФЯНОК УЛАДЗІМІР ПЯТРОВІЧ.
Беларускі саюз мастакоў выказвае шчырае спачуванне родным, блізкім, сябрам і калегам Уладзіміра Парфянка.
Уладзімір Парфянок быў не толькі самабытным фотамастаком са сваёй адмысловай і сучаснай выяўленчай мовай, звяртаючыся ў сваёй творчасці да самых розных тэм і сюжэтаў. Ён быў выдатным знаўцам гісторыіі беларускай і сусветнай фатаграфіі, аналітыкам актуальных працэсаў ў беларускай фатаграфіі і арганізатарам творчага працэсу ў фотамастацтве Беларусі: куратарам калектыўных выставаў фатаграфіі (з 1990 па 2022 правёў 75 выставачных праектаў), рэдактарам фатаграфічнага вэб-альманаха, рэдактарам грунтоўнага друкаванага выдання па “новай хвалі” ў беларускай творчай фатаграфіі.