3 жніўня а 17-й гадзіне ў Нацыянальным мастацкім музеі Рэспублікі Беларусь адбудзецца ўрачыстае адкрыццё выставы твораў Мікалая Таранда “Колер жніўня”.
Мастацкая спадчына Мікалая Таранда вялікая і разнастайная – сотні жывапісных, графічных твораў, выкананых у розных жанрах і тэхніках, якія ўпрыгожваюць музейныя і прыватныя зборы. За 50-гадовую творчую дзейнасць мастак прыняў удзел у больш як 40 рэспубліканскіх выставах, адбылося 20 персанальных выстаў аўтара.
Мікалай Таранда з’яўляецца тым унікальным прыкладам мастака, які ў сваёй творчасці спалучае фігуратыўны і абстрактны жывапіс. Гэтыя два полюсы – пейзаж і беспрадметная кампазіцыя – узаемадзейнічаюць у прасторы яго паэтыкі і складаюць галоўную інтрыгу творчасці.
З другой паловы 1980-х гадоў выкрышталізоўваецца характэрная жывапісная манера Мікалая Таранда, шмат у чым сфарміраваная пад уплывам яго настаўніка Алега Арлова, а таксама ад глыбока шанаваных ім французскіх імпрэсіяністаў, фавістаў і постімпрэсіяністаў, асабліва Поля Сезана. Безумоўна, у яго манеры фіксуюцца і пункты судакранання з беларускай жывапіснай школай, але ў традыцыйны рэалізм Мікалай Таранда ўносіць рухомасць і экспрэсіўнасць, а імпрэсіяністычную звонкасць змякчае лірыкай і сумам, уласцівым Беларусі з яе камернымі фарбамі зямлі.
З гадамі яго пластычная мова ўсё больш экспрэсіўная і будуецца на прынцыпах асацыятыўнага формаўтварэння. Пейзаж становіцца мастацкай нагодай, спосабам рэалізацыі жывапіснай прыгоды, на якую Мікалая Таранда натхняюць зусім розныя рэчы – няхай гэта будзе ўласны сад мастака з квітнеючымі касачамі або смарагдавая, працятая сонечнымі прамянямі вада сажалкі.
У экспазіцыі юбілейнай выставы будуць прадстаўлены жывапісныя творы, што найбольш яскрава выказваюць творчае крэда аўтара – пейзажныя матывы, кветкавыя нацюрморты і вялікая серыя абстрактных кампазіцый.
Творы Мікалая Таранда знаходзяцца ў Нацыянальным мастацкім музеі Рэспублікі Беларусь, Нацыянальным цэнтры сучасных мастацтваў Рэспублікі Беларусь, Дзяржаўным літаратурным музеі Янкі Купалы, Віцебскім абласным краязнаўчым музеі, Аршанскай гарадской мастацкай галерэі В. А. Грамыкі Музея гісторыі і культуры горада Оршы, Мастацкай галерэі горада Полацка Нацыянальнага Полацкага гісторыка-культурнага музея-запаведніка, Мастацкай галерэі Палаца мастацтваў горада Перніка (Балгарыя), Смаленскім дзяржаўным інстытуце мастацтваў (Расія), прыватных калекцыях у Беларусі, Балгарыі, Германіі, Латвіі, Літве, Польшчы, Расіі, ЗША.