З 20 студзеня ў Мастацкай галерэі Нацыянальнага Полацкага гісторыка-культурнага музея-запаведніка распачала сваю працу выстава V Трыенале дэкаратыўнага мастацтва «Дэкарт-22». Выбранае. Гэты рэспубліканскі арт-праект Беларускі саюз мастакоў праводзіць раз на тры гады і задачы ставіць шырокія: паказаць сучаснае прафесійнае дэкаратыўнае мастацтва Беларусі, сімбіёз традыцыйнага і наватарскага.
У полацкай экспазіцыі прадстаўлены выбраныя работы мастакоў розных пакаленняў і творчых напрамкаў. На выставе можна ўбачыць нечаканыя формы і эксперыменты, якія нясуць рысы наватарства, вырастаючы ў сучаснае аб’ектнае мастацтва, а таксама творы, вытканыя або сплеценыя з нітак, тканіны, дроту, адлітыя з металу, злепленыя са шкла, керамікі і іншых матэрыялаў. Выстава ў Полацку прадстаўляе зрэз творчых пасылаў, традыцыйных і эксперыментальных заявак мастакоў у галіне дэкаратыўнага мастацтва, дэбюты маладых аўтараў – што ў сукупнасці з’яўляецца натхненнем для будучага развіцця гэтага мастацтва.
Спадзяемся, што наведванне выставы Трыенале дэкаратыўнага мастацтва абудзіць спакусу ў кожным акунуцца ў свет творчасці.
