Беларускі саюз мастакоў і Саюз мастакоў Расіі прадстаўляюць выставу «СССР-100», якая 12 студзеня 2023 года адкрылася ў залах Новай Траццякоўскай галерэі ў Маскве.
У экспазіцыі выстаўлены работы сяброў двух саюзаў мастакоў,, а таксама знакавыя творы вядомых майстроў савецкага часу.
Выстава «СССР — 100» — гэта сімбіёз жывапісу, графікі і скульптуры. У экспазіцыі сабраны самыя рэдкія і ўнікальныя працы, пачынаючы з 30-х гадоў мінулага стагоддзя.
Гасцей, удзельнікаў і сяброў, калег з Беларусі павіншаваў з урачыстым адкрыццём выставы старшыня Саюза мастакоў Расіі Андрэй Кавальчук: «Саюз мастакоў Расіі не мог прайсці міма такой важнай гістарычнай падзеі. У СССР былі створаны розныя творчыя саюзы, якія і сёння працягваюць працаваць у Расіі, Беларусі і іншых былых рэспубліках СССР. У 30-я гады, калі зараджаліся творчыя саюзы, мастацтва развівалася вельмі актыўна. Гэта дало магчымасць кансалідацыі ўсіх творчых сіл таго перыяду і працягваецца дзесяцігоддзі. З нашым дружалюбным Беларускім саюзам мастакоў мы вырашылі арганізаваць цікавую выставу, у якой існуе і рэтраспектыўная зала, і залы нашых сучаснікаў. Прадстаўлены работы 30-х гадоў мінулага стагоддзя і 20-х гадоў 21 стагоддзя». Андрэй Мікалаевіч выказаў пажаданне, каб усе традыцыі, закладзеныя нашымі выдатнымі мастакамі, шлях якіх працягваюць сучасныя аўтары, развіваліся і надалей: «І маладыя мастакі, і тыя, хто прыйдзе пасля, будуць бачыць створанае ў 20-м стагоддзі – гэта фарміруе падмурак сучаснага мастацтва».
Старшыня Беларускага саюза мастакоў Глеб Отчык таксама прывітаў гасцей і выказаў удзячнасць кіраўніцтву і камандзе Саюза мастакоў Расіі за плённае супрацоўніцтва: «Гэтая выстава сведчыць пра многае: наша сяброўства, вялікую гісторыю, вялікія традыцыі і тое, што пранізвае наша пакаленне і ўсе работы, – неверагоднай любові да жыцця, адно да аднаго і шчырасці. Гэтыя карціны спыняюць і бударажаць. Сёння, у цяжкі час, гэта вельмі добры знак і крок, які сведчыць аб тым, што ў нас вельмі моцныя традыцыі і карані, магутны падмурак і агульная гісторыя, якую мы не даём, не дадзім перапісаць».
Усяго на выставе прадстаўлена каля 400 работ.
