У Рэспубліканскай мастацкай галерэі “Палац мастацтва” 1 лютага 2024 года ў 18.00 адкрываецца выставачны праект “ЭСПЕРЫМЕНТАЛЬНЫ КАНТАКТ”, прысвечаны памяці беларускага мастака-эксперыментатара АЛЕСЯ РОДЗІНА (1947-2022).
Ёсць такія мастакі, што як зоркі: нават сыходзячы ў нябыт, яны застаюцца арыенцірамі на творчым небасхіле, пачынаюць ззяць праз час яшчэ мацней. Такім мастаком быў і Алесь Родзін, якому прысвячаецца выстава-успамін “Эсперыментальны кантакт”. Куратар выставы – Зміцер Юркевіч, сябра і спадзвіжнік па арганізацыі творчых фестываляў.
Алесь Родзін (з інтэрв’ю): “У мастацтве я тут і не тут, я ўсюды і нідзе. Я павінен быць ва ўсім. Мастак павінен быць бясскурым. Ён павінен толькі адчуваннем жыць – тады ён праваднік. Праз яго ідуць фатоны, нейтроны, пратоны. Ён прапускае праз сябе гэтае боскае скіраванне, нанізвае, стварае і далучаецца да нечага. Тут, усюды і нідзе…”
